文章分類: My Wedding (VIVIのBlog)

結婚一週年啦

vicky_to — Sun, 28 Dec 2008 20:34:30 +0800

今日係結婚一週年紀念日，還記得上年尼日過得非常之開心。雖然今日好平淡咁渡過，不過今年我地多左個BB陪我地，BB陪我地渡過好多喜慶日子；如浩B既生日、我既生日、聖誕節、結婚週年紀念日同埋黎緊既除夕，BB既出世都算出世得合時啊，佢係我地所有喜慶日子既禮物，而且我最想最想佢係十一月出世同埋仲要係天蠍座，尼兩樣都比我恨到己經好開心啦，開頭我都幾驚佢早過十一月出世或者過期居留嫁.......哈哈

BB就黎兩個月大啦，依家佢變左好多囉

結婚一週年紀念前夕

vicky_to — Sat, 27 Dec 2008 19:31:35 +0800

聽日就係結婚一週年正日，因為晴爸爸後日要返早，為免聽日攪到好夜先訓，所以提早今日慶祝啦！

下午，我地一家三口出左去新城市廣場行街同買埋今晚既食物，其實同埋BB出街要預備好多野，BB既行裝都好重下，所以去得耐既話，我係唔會單獨同亞B出街既！行到咁上下時間，我地就去一田買食物啦，我地今晚決定食和牛鐵板燒，去到一田超級市場，一見到D和牛己經流口水啦，還記得上年去北海道食和牛食到念念不忘，一年先食一次和牛又唔會食到悶，我地買左兩塊A5級和牛，同埋買左D刺身&其他野食就歸家啦。

返到屋企，我地先同BB沖涼，然後就拎返成年無用過既鐵板燒烤爐出黎，SET好晒野就開始食我地既晚餐啦，D和牛果然好好味，真係食到唔停得口呢！

你地睇下D和牛幾靚....XDDD

塊和牛仲大過BB個頭嫁......哈哈哈

gift

vicky_to — Thu, 18 Dec 2008 23:06:26 +0800

仲有10日就一週年結婚紀念日啦，今日浩B送左對耳環比我，我當然好開心啦！其實你唔送野比我，我都會好開心，因為今年我地多左個BB女，尼個女帶比我地好多歡樂，雖然湊BB好辛苦，但係辛苦得黎我都好開心啦

謝謝你

婚後的第一天

vicky_to — Sat, 29 Dec 2007 23:35:58 +0800

尋晚成零晨四點先訓，今日超唔願意地十一點起身，因為二點前要去MONALISA還衫，去完MONALISA還衫後就去買用品準備明天的北海道之旅，買買買...買左成個下午後就返去浩B家吃飯，然後就執行李，執到成兩點先訓，第二朝又要五點起身，即係尼兩日無乜訓過覺，超累........-_-，不過都好期待明天既來臨 ^o^

BIG DAY

vicky_to — Fri, 28 Dec 2007 23:59:55 +0800

大大大日子到了，我一早7點鐘就起身梳洗等TATA來幫我makeup，tata,bean & lolo 大約7點半鐘就來到我家，沒遲到呢......XDDDD！tata來到就立刻幫我化妝SET頭，好快就攪掂左我，跟住就到我妹妹，亦都好快攪掂左！攝影師同錄影師及其他姊妹慢慢都到達我家。差不多九點半，新郎同兄弟們就到達我家樓下佈置花車，LOLO就同攝影師們一起落樓下，lolo就開始玩第一個玩戲了！浩B過左第一關後，lolo就返上來準備其他遊戲，我看回錄影片段，真的笑到我反肚呢。玩完遊戲就斟茶比媽咪亞爸，嫲嫲同姑姐姑丈，然後就出發去浩B家lu。到達浩B家，上左香就斟茶給他們，然後就回門lu，返到我家砌燒豬，大家齊齊吃，我就吃左一兩件就算，沒胃口呢。換上婚紗後就準備出發去註冊處，大約兩點就到註冊處，我們是下午第一pair註冊呢，註冊完畢後拍拍照，然後就上酒樓，過了半日，我己經累到嘔電了。在酒樓休息下，TATA就幫我轉妝轉頭，當時我真的想訓著呢。在酒樓，兄弟姊妹們都忙於準備賓客既來臨，一切準備好晒，他們應該輕鬆得多了，不過MC們就忙於對槁及攪遊戲的問題，而我同浩B就繼續做人肉布景板。好了，到8點時，賓客都差不多到齊，大家就開始準備進場既時刻。一齊準備好就正式開始了，整個過程都好順利。今晚所有野都好流暢，只有一點少事發生，但係我己經心滿意足了，終於完成了一件人生大事。

今晚我真的很開心，因為大家都好投入去玩，氣氛很好，整個run down都是如我們所想的，沒半點不快事發生，真的要謝謝所有兄弟姊妹們的幫忙，FIBO小姐，幫我找回東東，BEAN MC小姐的落力演出，TATA化妝小姐的技術，LOLO遊戲小姐的諗頭，小茵小姐幫我點金器及其他細節地方，傻wing車手小姐接載姊妹們，我妹妹執頭執尾及守櫃枱關口，兄弟們打點一齊事項同所有粗重功夫.....等等的一切一切，令我同浩B都很安心，真的要十萬個謝謝他們！

I AM SO HAPPY ！！！

(閱讀全文)

明天就係大日子啦

vicky_to — Thu, 27 Dec 2007 21:10:30 +0800

聽日就大日子了.....係！我仲好有時間去寫BLOG.......XDDD！簡單UPDATE下前幾日既事先！

23 DEC 07 - 姊妹們&兄弟們來我家開終極會議，玩到11點就散水

24 DEC 07 - 放工去左上環買頭飾比妹妹，跟住就過金都買緊d野

25 DEC 07 - 九龍區一日遊，先去ssp買絲帶各樣用品，然後再落mk買咕0臣、蓮子、彼肩、花車裝飾.....等等，然後要TST買埋其他野，跟住就返去食飯整野，好忙的一天。

26 DEC 07 - 起身分小禮物，整RUN DOWN，點名紙....各樣各樣，攪到半夜3點先去訓

27 DEC 07 今天 - 整座位表....等等，之後就去monalisa拎衫，然後去拎花球，個花球都係我心中想要既款，滿足了，跟住去拎埋西餅攪埋少少手尾就返家吃飯了

Final Fitting

vicky_to — Sat, 22 Dec 2007 22:21:46 +0800

今日五點去MONALISA final fitting，serve 我果位小姐都係一直幫開我果位KRIS，尼個姐姐仔算幾好服務嫁，最緊要唔黑面啦！我算好彩嫁啦，係MONALISA遇到個好sales，好mua同cam man！

今次由我妹試先，KRIS話我妹比上次肥左，肥左咪好囉，無咁瘦！同埋今次再試件衫真係好睇過上次試果時，上次真係.......！我妹妹試完就到我啦，基本上都好fit身，係low cut果件有點鬆要再改，不過可以即時改得完，即時試，唔水去多次。我試完就到ho b試，ho b好fit身，乜都唔洗改過，試完之後就返浩b家吃飯。吃完就去新城市，諗住去永安拎埋D茶會資料，點知今日做冬，間間都早收，結果去左運吉！

仲有六日就到BD啦，時間不知不覺咁就到，年頭覺得有排先到，點知依家覺得好似無乜時間再預備咁啦，唔知果日會點既呢.......=口=

過大禮

vicky_to — Sun, 09 Dec 2007 22:26:41 +0800

今日十一點就起身，訓左應該都有十個鐘既，不過訓完都係好累咁。梳洗好，就等浩b起身梳洗，然後就返我家進行尼個過大禮儀式啦。其實都無乜野要攪，只係拜下神咁啦，攪左兩個鐘就攪掂啦。跟住就返浩b爸舖頭，因為要裝寬頻，我就係度發牛豆，其實我尼個禮拜無乜心情講野同埋諗野，浩b問乜，我都會話"唔知" or "是但"，因為我好煩，煩到連諗我都唔想去諗任何野，個腦一片空白就最好。整完個寬頻，就去左沙田訂埋花球，然後再返浩B家燒埋D食剩既野。燒燒下野食，浩B家中果隻黑狗爸爸同隻唐狗打交啊，隻唐狗咬到隻黑狗爸爸流左好多血，真係好多血，成地都係，用左幾塊布，又用D消炎藥黎外敷先止到血，嚇死我，我驚既唔係D血，而係佢地打交好恐怖，好惡，真係好惡，隻唐狗死咬住黑狗爸爸個咀唔肯放，如果我比佢咬一啖都唔知點算。攪左成個鐘，先繼續燒埋d野，但其實己經無乜胃口食野了！

03.Dec.07

vicky_to — Mon, 03 Dec 2007 23:09:17 +0800

今日放工去左MK，因為要拎D相比攝影師整婚禮既片頭。浩B先到左MK，佢行左陣去睇B女，跟住我就係銀城會合佢，之前兆萬埋緊$699既ANGELICA EVE，依家要$799喇，隔左兩日就貴左。但銀城只係仲埋緊$720，雖然都貴左$21，但考慮過一會兒後，就買左喇！尼個b其實我幾鐘意，我諗緊拆唔拆是但一隻去日本好呢，定帶返本身玩開果d好呢？

買完b，就上去攝影師OFFICE到啦，係路經朗豪坊時，浩b突然見到個女熟口熟面，啊..........原來係傻WING，佢身邊果個就唔講啦.......XDDDD，上到去攝影師到，比佢看過D相後，無問題我地就閃喇，應該兩個禮拜後就有得睇個槁啦！

婚戒

vicky_to — Sun, 02 Dec 2007 23:10:57 +0800

訂左個幾月，今日浩B收到電話，說我們的婚戒到左啦，所以我們下午就出去pick up啦！去到ctf2，個sales姐姐就拎對婚戒給我們看，試過size ok，對過名無錯，就比埋尾數走人，之後就去買晚餐返去食，同埋睇返<<鐵咀銀牙>>大結局。

--------------------------------------------------------------------

哭過兩天，沒事了。我明白人總會面對離別，傷心是在所難免的。今天起，亞B會長留在我心中。

one month only

vicky_to — Wed, 28 Nov 2007 22:27:08 +0800

時間過得真快，仲有一個月就到我大日子喇，到依家我都好似仲有好多野未做好同未買。時間越黎越近了，但我好似唔係好想咁快就到果日咁，一諗起果日就會覺得果日會好亂，好恐怖！想安排得好d，但又好似好難咁，好難預得好。但我另一方面又好想快d到果日，因為之後我可以去旅行玩，去relax下，近期真係幾多壓力咁。唉......唔諗咁多，我做人宗指，煮到埋黎就食啦，無野係做唔黎既！

魯奴小姐？

vicky_to — Mon, 26 Nov 2007 23:04:25 +0800

即係咁.......尼單野呢......唔係我攪出黎嫁bor！拿.......冤有頭債有主，LOLO小姐請向TATA尋仇啦，TATA會負責嫁啦

Wedding Card & Gift

vicky_to — Tue, 06 Nov 2007 22:52:28 +0800

尋晚接到sms通知回禮小禮物拎得，今日浩B就接到電話D帖拎得喇。所以今日放工我就先去太子交收小禮物，然後浩b出黎太子接我去酒樓拎帖。今日又完成多兩樣野喇，真係好！依家仲有D乜未做好呢，我唔知bor.......XDDDD ！等我得閒先諗下仲有乜未攪先......XD

Yeah！D帖到晒，我派得炸彈比你地啦，你地等收啦.........哈哈哈哈哈

金器

vicky_to — Fri, 26 Oct 2007 11:15:20 +0800

TODAY放工即閃返沙田，因為約左媽咪去買金器for我結婚嫁妝，我地食飽飽就去左周大褔睇金，媽咪話周大褔D手工靚D喎，所以去周大褔買。去到周大福，之前看中果條鏈己經不見了，給別人買左！咁睇過第二D款，係廚窗睇中左條一兩幾重既蝴蝶頸鏈，即時叫位姐姐仔拎比我地睇，試都未試媽咪就話要尼條，叫個姐姐仔hold住，跟住我就同媽咪講要試下睇下會唔會過長要cut短D，媽咪先記得要試，咁就叫個姐姐仔幫我試喇，結果真係要cut短D既！跟住就睇埋金鈪，媽咪睇中果D唔係龍鳳鈪，果D款比較新款D，無咁老土，而我都鐘意新款D果D款。媽咪睇中果對叫佢拎黎試，點知個圈大左D，問佢拎個細圈D黎試，個姐姐仔check過後話依家無貨要上office拎，過幾日先有。媽咪唔等，所以睇其他款，睇過幾隻款都話得返一隻，但我要一對嘛！最後諗住等既時候，佢check到我地睇中既金鈪有一隻比人hold左，但果個人無拎到，so果位姐姐仔決定賣比我地，哈哈！就咁樣係周大福磨左個幾鐘買左一條頸鏈及一對金鈪喇！依家D金好貴呢，D手工又貴，真係好金啊！！

酒席&婚戒

vicky_to — Sat, 20 Oct 2007 21:58:18 +0800

今日十一點鐘起身，跟住就同媽咪，浩b&浩b媽去飲茶，順便去傾埋酒席菜單D野。酒樓菜式都係果幾款吧，沒什麼特別菜式。怖置就選了西式，中式太老土了。飲完茶，傾好晒酒席D野就去睇床笠，之後兩個媽咪返左屋企，我跟浩b就去睇花球同婚戒。行左好幾間花舖都無我心中想要果d款，所以都係找相片給她們造吧！之後就行金飾舖，行左好幾間，終於都看中了一對玫瑰金比較特別的婚戒，這對婚戒要訂造個半月，要12月頭先取得，好彩還趕得切！原來諗住D婚戒會有現貨又或者改size都係需要等一至兩個禮拜到，所以一向懶懶行既我成日都無打算咁早去買.....XDDDD，好彩今日屎忽行去睇一睇，如果唔係就真係求求其其買對算了.......XDDDDD

今日又完成左幾樣野喇，實在太好了